الخاطرة الثامنة: لا تفسدي رمضانك بتضييع حجابك
خاطرة جديدة من خواطر حملة لا تفسد رمضانك...
لا تفسدي رمضانك بتضييع حجابك...
انهاردة الكلام شوية لاخواتنا البنات و امهاتنا و اهالينا النساء... و بردوا جزء كبير من الكلام للرجال...
لا تفسدي رمضانك بتضييع حجابك...
رغم ان دعوتنا بنحاول ان احنا بنيسرفيها على المسلمين و ده دين النبى صلى الله عليه و سلم:" يسروا و لا تعسروا و بشروا و لا تنفروا" و الأصل ان ربنا بعت الرسل مبشرين ثم منذرين و احنا بنحاول نبسط قدر الامكان حتي يشملنا الدين و يسعنا كلنا كما قال صلى الله عليه و سلم:" سيروا بسير أضعافكم"...
اما ان كل واحد فينا يجى يتكلم باللغة اللى الناس بتحبها و واحدة واحدة على الناس... لكن فى اوقات لازم نقف و نحط وقفة كده و نقول يا جماعة رمضان جى او يا بناتنا رمضان جاى... و انهارده الكلام للبنات اكتر اللى لسه مخدوش خطوة الحجاب... الصيام فيه ثواب كبير عند ربنا سبحانه و تعالى لأن الصيام من اكتر العبادات اللى ربنا بيحبها لان فيها كسر لشهوة النفس امام حاجة ربما بيحبها و ده من اكبر دلائل المحبة انك تخالف شهوتك عشان حاجة ربنا بيحبها عشان حاجة حبيبك بيحبها...
لكن للاسف الشديد ثواب الصيام الكبير قوى ده فى حاجة بتتعمل قصاده هى من الاعمال اللى ربنا ممكن يكون مش بيحبها الا و هى ان الواحد او الواحدة يكون سبب فى فتنة غيره و سبب فى معصية غيره و سبب فى انشغال غيره مش فى ربنا بل بذنب اختنا الطيبة اللى لسه مخدتش خطوة الحجاب ..
انتم عارفين مشكلة ترك الحجاب هو ان معصية ترك الحجاب هى ليست معصية خاصة بالنفس بل هى معصية خاصة بالنفس و خاصة بأمة محمد صلى الله عليه و سلم ..
ربنا بيحب الناس اللى يخدم بي الناس .. اللهم اهدنا و اهدى بنا و اجعلنا سبب لمن اهتدى .. مش الواحد يكون سبب ان حد يفكر فى معصية و ينسى ربنا و يفكر فى شهوته و ينسى النبى صلى الله عليه و سلم .. كل بنت لسه مخدتش خطوة الحجاب هى ممكن تكون سبب فى أن واحد ينظر عليها طبعا ليس واحد و لا اتنين و لا عشرة طول ما هى ماشية فى الشارع انتم طبعا عارفين الشباب دلوقتى بسبب كثرة الفتن ازاى فى مشكلة فى غض البصر و بلاش بعض البنات يقولوا ايوه بس انا بكون نازلة محتشمة و مش لازم كل مرة أكون عاملة شعرى فمش هبقى حاجة تتبص عليها اوى .. اى جزء من جسد المراة ربنا امرها بتغطيته يبقى هذا الجزء فتنة للناس و فتنة للشباب بل ساعات ان البنت اللى مش محجبة فتنة لاختها اللى اتحجبت و فتنة لاختها اللى لسه لم تتحجب...
كمان اللى اتحجبت بتقول ياة دى شكلها حلو واضح ان انا خدت الخطوة دى بدرى شوية او انا لابسة لبس كدة مضيع شبابى و مضيع جمالى و البنت اللى لم تتحجب لما تشوف حد زيها تتونس بيها...
لما تكون فى بنت مش محجبة فى و سط شلة كلها محجبة وبيكون أسهل لها أنها تتحجب و اما تكون بنت محجبة فى وسط شلة مش محجبة بيبقى سهل أنها تخلع الحجاب ..
طبعا الكلام ده مش لازم يبقى صح اوى لان فى ناس ثابتة فى وسط اجواء الفتن لكن فى الاخر الانسان بيتونس باللى حواليه فكل ما كان فى بنات مش محجبات فكل ما بيتأثروا ببعض و العكس و كل ماكانت فى محجابات فكل ما بيتأثروا ببعض...
فيا أيتها المسلمة أختنا و أمنا و بنتنا...
أرجوكى خدى خطوة الحجاب...
أرجوكى لاتفسدى صيامك و رمضانك...
و تُضيعي حجابك بكثرة النظرات اليكي ...و الرجال يتكلموا عليكى و يفكروا فيكى و حضرتك عارفة اد ايه ممكن منظر يشغل بال و قلب ولد بواحدة...
الكلام التانى المهم جدا لاخواتنا و نسائنا المحجبات ..
الحجاب ضيق شوية و كأن فى اجزاء كتير من لبس المحجبات تشبه لبس غير محجبات بس الشعر متغطى او الجلد متغطى بس متغطى بحاجة واصفة الجسم و الجلد...
رمضان جاى حضرتك أخذتي خطوة الحجاب مبروك عليكى و على المسلمين و علينا كلنا اى حد يقرب من ربنا ..
و لكن بلاش نقرب من ربنا بمزاجنا أحط رضايا فى كفة و رضا ربنا فى كفة ...
ربنا قال اتحجبوا و انا عاوزة يبقى شكلى حلو .. خلاص نقسم البلد نصين...
ألبس لربنا الحجاب بس على مزاجى انا فهو يرضى شوية و انا أرضى شوية "فلا تجعلوا لله أندادا و أنتم تعلمون "..
أوعى حد يجعل نفسه أو أى حاجة ند لله فنرضى ربنا شوية و الحاجة التانية دى شوية...و تبقى كارثة لو اخترت رضا نفسى فى مقابل ربى سبحانه و تعالى...
فلا تفسدى رمضانك بتضييق حجابك .. و اللبس اللى ممكن يكون بيفتن بنات و شباب كتير...
يارب خد بايدينا و اهدينا و استرها معانا يارب بالذات فى الكليات والشوارع و كل حتة ..
فلا تفسدى رمضانك بتضيع حجابك...
و أملى ان الشباب يغضوا بصرهم عشان ربنا يقبل صيامنا و صيامنا يؤثر فينا ومش ندخل رمضان نطلع منه زى ما دخلناه قبل كده...
ربنا يأخذ بأيدينا ان شاء الله و صلى اللهم و سلم و بارك على الحبيب و الحمدلله رب العالمين...
